MWILI WA MWANAMKE ALIYEUAWA KWA KUPIGWA RISASI WAZIKWA

Mwili wa mwanamke Swalha Salum mkazi wa Buswelu wialayani Ilemela jijini Mwanza aliyeuawa kwa kupigwa risasi na mumewe wa ndoa, umezikwa jijini Mwanza, ambapo majonzi na huzuni vimeendelea kutawala eneo hilo.

Swalha alipigwa risasi Jumamosi Mei 28, 2022 na mumewe, Said Oswayo wakiwa nyumbani kwao katika mtaa wa Mbogamboga, Kata ya Buswelu wilayani humo baada ya kuibuga ugomvi kati yao kwa kile kinachodaiwa kuwa ni wivu wa mapenzi.

Siku mbili baada ya kutekeleza mauaji hayo huku juhudi za maofisa wa Jeshi la Polisi kumtafuta mtuhumiwa zikiendelea, Jumatatu ya Mei 30, 2022, mwili wa Oswayo ulionekana ukielea kwenye maji ya Ziwa Victoria katika Ufukwe wa Rock Beach jijini Mwanza huku ndugu wakithibitisha kuwa ni mwili wa ndugu yao.

“Hata maandiko ya dini yanatuelekeza kuwa na subra wakati wa matatizo kwa sababu usipofanya hivyo huenda ukasababisha madhara zaidi ya haya yaliyotokea hapa. Pia tumtangulize Mungu katika kila jambo tunalolifanya,” amesema Shehe Salum aliyeongoza mazishi ya mwanamke huyo.