Kadhia ya maji kutuama katika maeneo mengi ya Jiji la Dar es Salaam wakati wa mvua imezua mjadala mkubwa bungeni huku Mbunge wa Same Mashariki kutoka Chama Cha Mapinduzi (CCM), Anne Malecela, akitoa hoja yake kwa Serikali kuhusu hatua zinazochukuliwa kukabiliana na tatizo hilo.
Akichangia mjadala huo, Mbunge Malecela alihoji ufanisi wa hatua zinazochukuliwa na Serikali katika kukabiliana na kadhia ya maji yanayotuama katika jiji hilo kubwa la biashara na makazi.
Kwa upande wake, Naibu Waziri katika Ofisi ya Rais Tawala za Mkoa na Serikali za Mitaa (Tamisemi), Dk. Festo Dugange, alijibu hoja hiyo kwa kutoa maelezo ya kina kuhusu hatua ambazo Serikali imechukua ili kudhibiti athari za mvua katika Jiji la Dar es Salaam.
Dk. Dugange alieleza kuwa Serikali inaendelea na jitihada za kujenga kingo za mito na mifereji mikubwa katika jiji hilo. Alitaja mradi wa Uendelezaji Jiji la Dar es Salaam (DMDP) ambapo tayari mifereji yenye urefu wa kilomita 30.7 imeshaanzishwa kwa gharama ya Shilingi bilioni 60. Aliongeza kuwa kupitia awamu ya pili ya mradi huo, Serikali inaendelea na usanifu na utambuzi wa maeneo kwa ajili ya ujenzi wa mifereji na mito yenye urefu wa kilomita 101.15, ambayo inakadiriwa kugharimu Shilingi bilioni 200 katika wilaya zote za Mkoa wa Dar es Salaam.
Kuhusu jitihada za kuboresha hali ya mto Msimbazi, Dk. Dugange alieleza kuwa Wakala wa Barabara za Vijijini na Mijini (Tarura), kwa kushirikiana na Wakala wa Barabara Tanzania (Tanroads), wanatekeleza hatua za ununuzi kwa ajili ya uboreshaji wa mto huo. Hatua hii inalenga kupunguza mafuriko na athari zinazosababishwa na maji kutuama katika Jiji la Dar es Salaam.
Mbunge Malecela aliipongeza Serikali kwa juhudi zinazofanywa katika kudhibiti kadhia ya maji kutuama lakini alisisitiza umuhimu wa kuhakikisha kuwa miradi inatekelezwa kwa wakati na kwa ufanisi ili kuwalinda wananchi wa Dar es Salaam dhidi ya athari za mvua kubwa.
Mjadala huu bungeni umeonyesha umuhimu wa kuchukua hatua za haraka katika kukabiliana na tatizo la maji kutuama katika jiji lenye watu wengi la Dar es Salaam, huku Serikali ikiendelea kutoa ufafanuzi na kutekeleza miradi ya miundombinu ili kulinda maisha na mali za wananchi.
@KonceptTvUpdates
