Rais Samia Suluhu Hassan wa Jamhuri ya Muungano wa Tanzania amefichua kuwa amepokea ombi kutoka kwa mmoja wa viongozi wa nchi wanachama wa Jumuiya ya Maendeleo Kusini mwa Afrika (Sadc) la kumwomba abadilishe balozi wa nchi hiyo. Rais Samia aliyasema haya wakati wa hafla ya kuwaapisha mabalozi wapya leo tarehe 16 Agosti, 2023, katika Ikulu ya Chamwino jijini Dodoma. Hafla hiyo ilihudhuriwa na wageni mbalimbali, akiwemo Waziri Mkuu Kassimu Majaliwa.
Ingawa Rais Samia hakumtaja kiongozi huyo wala nchi yake, alisema kuwa alikutana naye wakati wa mikutano ya viongozi wa Sadc na kueleza kuwa mabalozi wa nchi hiyo hawakuwa wakifanya kazi kwa ufanisi. Alisema kuwa viongozi hao walilalamika kuwa balozi aliyekuwa ameteuliwa hakuwa akishiriki katika mikutano na haikuwa wazi kama alikuwa akichangia kikamilifu katika majukumu yake.
Rais Samia alisema, “Mabalozi wengine unawaona pale ambapo ujumbe wa Tanzania umekwenda kwenye nchi hiyo au siku za sherehe za kitaifa lakini hauoni kitu cha maana kinachokuja kutoka kwenye maeneo hayo, sasa inawezekana labda ni aina ya mabalozi tunaowapelekea.”
Katika hafla hiyo, Rais Samia aliwaapisha mabalozi wapya sita, ambao ni Balozi Gelasius Byakanwa (Burundi), Balozi Habib Awesi Mohamed (Qatar), Balozi Imani Njalikai (Algeria), Ramson Mwaisaka (Rwanda), Hassan Mwamweta (Ujerumani), na Mohamed Juma Abdallah (Saudi Arabia). Rais Samia aliwasisitizia wajibu wao wa kuwakilisha vyema Tanzania katika nchi wanazokwenda.
Rais Samia aliwaelekeza mabalozi hao kwenda kufanya kazi kwa kuzingatia matokeo na kufanya jitihada za kujenga uhusiano bora na mataifa wanayokwenda. Aliwataka kuepuka kutegemea matukio tu ili kujionyesha, bali wazingatie kutekeleza majukumu yao kwa umakini ili kuendeleza maslahi ya Taifa.
Aidha, Rais Samia alisisitiza umuhimu wa mabalozi kuelewa mahitaji mapya ya dunia katika enzi hizi za mabadiliko, ikiwa ni pamoja na mabadiliko ya tabianchi, mapinduzi ya viwanda, na maendeleo ya teknolojia. Aliwataka mabalozi kujitahidi kuelewa mazingira na fursa za nchi wanazopelekwa ili kuweza kuimarisha uhusiano wa kidiplomasia na kuendeleza maslahi ya Tanzania.
Rais Samia pia alitoa wito kwa Wizara ya Mambo ya Nje kuainisha majukumu, wajibu, na stahili za kila balozi ili kuhakikisha kuwa wanawakilisha vyema maslahi ya Tanzania katika maeneo wanayopangiwa.
Waziri Mkuu Kassimu Majaliwa aliongeza kuwa Tanzania ina matumaini makubwa kwa mabalozi hao katika kukuza uhusiano na mataifa mengine, na kwamba diplomasia ya nchi inahitaji kuimarishwa katika masuala ya kisiasa na kiuchumi.
Waziri wa Mambo ya Nje na Ushirikiano wa Afrika Mashariki, Dk Stergomena Tax, aliishukuru Rais Samia kwa kuongeza nguvu kazi ya wizara hiyo na alieleza matumaini kuwa mabalozi hao wataleta mchango mkubwa kwa Taifa.
#KonceptTvUpdates
