Rais wa Jamhuri ya Kidemokrasia ya Kongo Felix Tshisekedi ametoa wito wa kuondolewa haraka kwa ujumbe wa walinda amani wa Umoja wa Mataifa ambao umekuwa katika taifa hilo kwa karibu miaka 25.
Akihutubia Mkutano wa Baraza Kuu la Umoja wa Mataifa jijini New York hapo jana, Tshisekedi amesema ujumbe huo wa walinda amani wenye askari wapatao 15,000 umeshindwa kukabiliana na uasi wa makundi yenye silaha, kuwalinda raia na hata kurejesha amani nchini humo.
Aidha kwa mujibu wa ripoti ya DW Swahili umesema Rais huyo wa Kongo amesema kuwa ni wakati sasa wa taifa hilo kuchukua hatima yao mikononi ili kuweza kurejesha amani wakongo wenyewe.
“Nimeiagiza Serikali kuanza majadiliano na mamlaka za Umoja wa Mataifa ili kuhakikisha inaharakisha zoezi la kujiondoa kwa MONUSCO kutoka Jamhuri ya Kidemokrasia ya Kongo, na kubadili muda wa mwisho wa kujiondoa kwa vikosi hivyo kutoka Desemba 2024 hadi Desemba 2023,” alisema rais Tshisekedi.
Kwa miaka kadhaa sasa, suala la kuondoka kwa vikosi vya MONUSCO limekuwa kiini cha mijadala na mivutano hasa kuhusu mustakabali wa taifa hilo la Afrika ya Kati.
Mnamo mwaka 2020, Baraza la Usalama la Umoja wa Mataifa liliidhinisha mpango wa kujiondoa kwa awamu nchini Kongo.
#KonceptTVUpdates
